1970年代香港學生運動關注中國 依家係求仁得仁定已成泡影?


  • Citi

    https://youtu.be/9j5SN9GVRAc


    頭先因故搵返呢隻歌來聽
    歌本身係日本NHK紀錄片絲綢之路主題曲
    無線買過來放 原先純音樂黃霑填咗詞落去
    雖然套紀錄片係架仔拍
    但其實都同當時嘅香港社運學運氛圍幾吻合
    我唔係香港人更冇親身經歷過 所以都係知d唔知d啦
    聽講70年代學生運動 有呢d關鍵詞
    認中關社 仲有好多派別
    https://zh.wikipedia.org/wiki/1970年代香港學生運動
    值得留意 好多今日嘅有錢佬、打工皇帝、高官、政治人
    當年都係參與者

    現代中國 可以講係共產黨搞改革開放以來形成
    (古代中國到洋務運動為止 西式學堂興起 學生紛紛棄儒術 改學數、理、外文,認識世界。古代中國結束後,算係「啟蒙」時期,到土改、反右、文革為止。土改殺死鄉紳階層;反右係共產黨反智愚民政治運動之代表;文革直程係鼓吹讀書冇用,學術研究冇用,冚唪冷去耕田,或者批鬥批死。)
    開始行market economy,但係又冇晒傳統

    我要講嘅呢,係
    呢個現代中國嘅形成,呢班70年代80年代嘅香港大學生,有份
    好多人北上搵錢、傳授經驗、投資……
    睇返黃霑呢首歌詞
    都係充斥大中華意象
    NHK嗰套紀錄片,係以西安開始
    黃河、幾千年嘅都城……十分之中國
    今時今日呢個中國
    係咪就係佢哋嘅理想呢 得償所願呢
    經濟有少少發展
    多咗人食飽飯(舊時可能係70%食唔飽,毛主義共產黨治下係99%,依家鄧小平江澤民搞出來呢壇嘢之下可能得返10%食唔飽啦)
    (但其實食飽飯主要得益於農業革命,鬼佬發明嘅化肥農藥,鬼佬積累嘅農業、育種知識…… 睇 https://en.wikipedia.org/wiki/Green_Revolution 。共產黨係執死雞。鬼佬中學生都知嘅,green revolution帶來豐富食物,中國係冇乜人知,以為係改革開放發展經濟而來。)
    至於冇人權 不過係中國人傳統習俗啫
    政府(家長)啱晒 所以隨得政府點做
    社會穩定緊要 所以放棄自由 放棄私隱
    國家統一最緊要 所以乜嘢異議都唔忍得
    理想中國 不外如是

    所以佢哋係咪求仁得仁呢?
    抑或理想並非如此
    閂埋門自己一個人嗰陣
    都會覺得做錯咗 良心有愧呢?



  • 一代人做一代人嘅嘢,民智未開,能夠去做大愛包容,拯救中國已經係當時嘅香港人思想極限,唔好要求太多。我哋亦不能太過抱怨祖輩未能喺西關戰役趕絕孫大炮,又或唔夠團結支持陳濟棠。認識歷史,做好今日嘅自己。粵人同港人今日如能做到1776北美殖民地人嘅醒覺,冇話遲唔遲嘅。



  • 見親呢啲苛責前人冇前瞻性嘅文都覺得搞笑,往者不可諫來者猶可追,得閒應該去做可以改變未來嘅事,而唔係賴以前嘅人點點點。


  • Citi

    1. 樓主前幾日先轉過一篇長文,講中國嘅八個唔同層面,包括文化中國、鄉土中國等;
      咁呢班中華膠眷戀嘅係邊一個層面嘅中國?佢哋會唔會認同共產中國?

    2. 如果大陸今時今日嘅發展主要係因爲Green Revolution,同改革開放或者講制度變革關係唔大;
      咁同理係咪可以認爲西方嘅發達都同制度關係唔大?
      推而廣之,係咪衹要食飽飯,其他一切都自然而然?呢種講法同唯物辯證法所謂物質決定意識分別又係邊度?


  • Citi

    連續兩個都睇錯我寫乜
    我問嘅係今日中國係咪已如佢哋所願 定唔係
    如果佢哋係真心 覺得今日中國都幾好 當日理想已實現
    「國家統一、經濟繁榮、喺世界上係威係勢似模似樣」
    噉咪 求仁得仁 得償所願
    至於人權問題、環境問題、社會問題、中國同世界交惡……
    我睇法,呢d係大中華思想嘅必然後果
    冇話要怪責咩人
    從大中華上腦嘅人角度來睇 今日中國幾好吖
    橫掂人哋受難,又唔關自己事,個個名成利就,拍下蘿柚去外國嘆世界
    一邊嘆一邊大贊,中國發展真係又快又好吖
    每年去下北京開會,做「愛國港澳人士」,共產黨座上賓
    開完會就返英美加澳紐


  • Citi

    講埋我睇法都唔怕啦
    我覺得呢d人多數都求仁得仁 實現理想
    好似梁啟超、胡適、陳寅恪呢d堅持自由嘅學者
    乃至陳炯明呢d無政府主義者(安那其主義者,anarchist)
    喺中國人之中從來都係少數
    哪怕係推崇自由民主嘅中國人
    多數言必推崇政府
    一心要諗建立好政府、廉潔政府、高效政府
    而唔諗政府源自人民 只係提供公共服務架啫
    大把嘢根本唔使政府做 人民可以自治

    舊時d人之所以民族主義狂熱,言必國家統一民族富強
    無外乎幾個原因
    想像下企喺1950年睇中國
    1 人多地少如廣東,農業社會發展到極致,都食唔飽,以至於一百年來大批人賣豬仔到海外搵食
    2 亡國,俾日本仔打到仆街
    3 基礎設施落後,譬如鐵路得幾條幹線(津浦、平漢、粵漢、隴海……)
    4 城市公共服務落後,街燈、供電、供水etc
    5 工商業落後
    ……
    嗰時d人呢,我估佢哋面對呢d問題,諗法就梗係歸咎於
    國家屎,所以俾人打柒,又窮又餓
    d人就只能諗得到,
    國家要強大,要建設祖國,人人豐衣足食
    噉點做呢?
    國家統一,人民團結,齊心合力
    睇返由孫中山梁啟超開始到毛澤東鄧小平都係一個思路,中國屎波係因為人唔團結,所以我哋要諗辦法建立統一國家統一政府指揮全國

    從來冇人去諗
    軍閥混戰又好 亡於外敵又好
    根本原因在於
    中國人唔係自治
    政府唔係由人而來
    所以中國嘅土地,中國人,可以好似畜牲噉
    俾軍閥又好,列強又好,俾佢哋爭來爭去
    而呢d畜牲,思考點解自己個豬欄咁殘,自己過得咁辛苦
    個答案係因為豬欄主人唔夠英明 唔夠強大 唔夠齊心
    而唔係自己應該係人 應該自治 自己武裝 自己守衛自己屋企
    要自治 就必須係每個人都出力 人人平等
    就必須係自由、民主
    而唔係掉返轉 政府強大高效 社會就發達進步
    問一問中國人
    有幾多人會明
    政府應該源自人民
    人民自己能夠處理嘅 就唔使有個政府來做
    唔使政府做嘢嗰陣 政府官員、公務員唔該收皮

    所以咁多年來 所有呢d認中關社 香港人又好唔係香港人又好
    只要佢冇諗到個人自由、人民自治先最緊要
    做其他乜嘢所謂社會建設 全部都係本末倒置
    貪污?自由自治嘅社會可以vote them out
    瀆職?手腳慢?笨撚柒?自由自治嘅社會可以揀過個叻人。甚至乎叻人自己行出來踢開政府直接提供公共服務。
    nepotism?官商勾結?同理,可以vote them out,換人。
    能夠保證自由嘅社會,自由競爭底下,國家、社會、經濟……自然能夠發展。
    冇自由嘅社會,都可以發展嘅,咪今日呢個衰款咯。
    我諗,多數人都係諗住國家發展,而冇諗點樣保障每個人嘅生活、人性、自尊
    所以要人犧牲小我為國家社會發展貢獻嘅嘢層出不窮
    來來去去中國人生於世上終極目的係為咗國家富強
    國家、城市、政府、老細、家長、老師……要你借me2 你就速速彈開
    世界上其他人首先係為咗自己生活得好 尊重每一個人


登入後回覆
 

相關主題

  • 9
  • 6
  • 15
  • 1
  • 14
  • 1
  • 12
  • 1
  • 5
  • 33