我有N個關於粵文化嘅夢



  • 20180628與網友對話


    我覺得呢,應該有一個粵語文化資料館, Cantonese Archives,去保存所有嗰啲廣東人先輩嘅文學、音樂、影視、藝術等等嘅創作,如果可以個話,收集版權,將d嘢數碼化、公開到public domain。
    香港戰後嘅電影業、唱片業、報刊,如果而家唔開始去保存,我驚過多二三十年,五十至七十年代嗰d作品就會死減一大橛。

    網友A
    另外網上有個廣東話資料館,唔知關唔關事


    嗰個應該差得遠啦。我講緊係應該類似香港電影資料館噉去收電影,或者美國d勁抽大學圖書館噉去廣泛收集。
    因為以前d嘢,錄喺菲林、黑膠碟、磁帶、CD碟度,d嘢wang咗就冇得掹
    報紙又係另一樣。

    網友A
    電影嘅話,西灣河嗰個電影資料館應該有豐富嘅藏品?
    不過廣州/南洋嗰堆保存成點就唔係幾知


    如果真係搞,會好大工程,要爭取香港政府同李嘉誠呢類大有錢佬科水。廣東地方政府有叻人有計或者都可以爭取下撥款嘅。

    網友A
    報紙嘅話,香港冇新加坡做得咁好
    咁樣會唔會政策大方向唔畀


    有高人氹得掂未有咯。或者由大學d人出面搞d project去撓funding咯
    而且只有大陸會民間搞都唔俾咋嘛。如果香港有人肯做,香港政府冇法子取締嘎
    呢個係保存資料嘅方面:Cantonese Archives。 不過你講起星加坡,我醒起其實我嘅諗法應該都係受佢地啟發。新加坡有個national archives。英國好似都係有個national archives。美國就係國會圖書館LOC。德國就係nationalbibliothek,德國佬真係乜嘢都存兩份copy。
    另一個方面,係文化推廣,應該整個類似British council嘅組織,負責推廣粵語、粵人文化。

    網友B
    內地有無?


    教粵語,比較重要嘅對象,係香港人、廣東人海外移民嘅後代,幫助d竹升提升母語水平,了解少少祖輩嘅文化同來源,毋個個一個唔該學咗mandarin同北方文化。另一種對象就係教唔係廣東人而想學粵語嘅。
    喺比照British council嘅「粵語文化協會」之外,我仲幻想一層,粵人互助、聯誼組織。類似於一百幾十年前d廣東會館。

    網友A
    保育圍頭話嘅嘗試係有慈善機構支持,不過圍頭話對mandarin/廣府話冇乜威脅。至於廣府話嘅保育工作,睇落比較低調,如果高調嘅話,條路未必咁好行(好似上次語言中心單嘢,其中一個人整咗個page推廣粵語,結果畀人話係港獨page


    呢d肯定嘎啦。細小嘅冇人會理,聲勢浩大嘅就會引起共產黨(實際上係北方人)猜忌。
    中共d語言政策當然有共產主義橫掃一切傳統同毛主義破四舊嘅加成,但係其實民國時候已經搞埋晒d現代版「書同文」政策,全國推廣官話。我個人認為呢d都係嶺南同北方嘅差異同衝突嘅表現
    呢二十年中共仲要加強咗推普政策,加上而家四圍獨獨聲風聲鶴唳,指意廣東香港等地嘅政府搞,我覺得有d man3水
    前文再續,我想define「粵地」先。我覺得而家得返廣東本身講粵語嘅地方、港澳,可以算粵地咯。廣西海南嘅情況我覺得可能而今2010年代出世嘅,已經丟失緊。不過無論點講都好。粵語族群來源嘅「粵地」,喺近代各國邊界明確,各地建立現代國家之前,就係今日嘅「廣東香港澳門廣西海南」。東南亞嘅馬來西亞嘅粵語族群都比較有規模。其它地方就應該都冇粵人佔多數/顯著部分,或者以粵文化為主嘅社會。

    網友C
    三藩市溫哥華嘅華人社區算唔算粵地?


    我幻想嘅現代「廣東會館」,職能包括 1【商貿、外交】代表粵地喺世界其它地方推廣粵地,類似而家香港d經貿辦。2【互助】方便海外各地粵人互相幫助,有事嘅時候可以互相接濟 3【聯誼】方便大家組織活動
    當然仲可以包括上邊嘅 粵語語言和文化推廣

    網友A
    新加坡有法定送存制度,所以至少SPH/Mediacorp嘅報紙係會儲落(National Archives係國家圖書館嘅兄弟,不過都有儲開Mediacorp同佢前身嘅電視節目),不過國外報紙就唔係幾清楚


    香港好似都有法定送存個嗬?好似係中央圖書館keep?
    廣東我諗應該冇。而且大陸由始至終最大問題都係冇制度規管。譬如唔好彩撞著個盲流做檔案館長圖書館長決定掉晒d嘢都唔會有人知
    理由亦唔一定係佢地特登,或者失火水浸搬屋裝修拆樓之類都分分鐘可以搞到d嘢冇鳩咗。仲未計如果有d嘢係值錢俾人偷走去賣

    網友A
    理論上係畀民政事務局審查,然後送去大會堂圖書館


    我上邊講嘅三樣,canto archives、canto council、廣東會館,要成立官方組織,係異想天開d。不過我覺得或者如果粵人有噉嘅心態,係要去積極保存自己嘅文化,傳落下一代,完全可以各有各做。各地粵人自發成立組織。
    所以我覺得可以做嘅,就係一小部分有心人,大家整d template出來,組建粵人組織嘅方法、粵文教育嘅材料、粵地推廣嘅材料,各地粵人有心嘅話,copy就得。啫好似open source寫軟件,鍾意嘅就自己copy過來自己又再加工佢噉。
    又可以類比d鬼佬傳教。😁既可以有官方派出去嘅,亦有狂熱分子自發去宣傳嘅。關鍵就係,宣傳嘅材料夠簡單夠容易複製(聖經、福音書等等),想做嘅人好容易就做得到。
    指意政府科水是幾乎不可能的了,唯有寄望粵人自覺。
    一個grand啲嘅諗法,就在於,呢套組織,或者仲可以參埋潮州人、客家人玩?
    照版煮碗,廣東文化協會潮汕部、客家部,同廣府部並存?一樣係去推廣自家語言、自家文化。
    我覺得而今三藩市係唔可以算嘅。因為佢地d社區都比較細,未至於係成忽多數都係粵人/粵人係主要力量。而且地方太局限於幾個城市埠,馬來西亞相比就更加算。
    不過,算唔算,好閒。我唔覺得我地搞得成官方機構。如果d人自己各有各做,鍾意宣傳邊度都無所謂嘎。譬如喺三藩市長大嘅第n代移民,佢梗系三藩市人啦,宣傳梗系宣傳自己地方啦。
    但係無論邊度嘅廣東人,都可以係講粵語,share相近嘅傳統習俗、飲食習慣等等嘎嘛。
    不過我自己個人都唔興過節嘅。喺出邊四圍轉得多,一支公都慣咗。但係喺他鄉偶然聽到有人講廣州話,都會覺得幾順耳嘅。
    我d白日夢發完了。


    20191011

    我想創一間廣東人嘅大學、一個Institut de France(科學院、研究院)、一個British Council(宣傳語言 對抗孔子學院)、一個文獻館(Archives)、一個公共通訊社(類似BBC/NHK/NPR)。


  • Citi

    支持,不過喺去r funding之前,建議先做一個可以小範圍實施嘅版本(有嗮做大嘅計劃,只不過礙於成本限制做得少少地方),因爲班大老世日日有人問佢哋攞錢:lomore-wfc2:

    可以試下叫大家數字化屋企啲舊嘢,再upload上呢個project嘅網站,如果喺轉磁帶、黑膠呢種一般人冇設備嘅,組織義工上門幫手。因爲政府嘅網站一般嚟講都會落後幾個世代,喺網站UI好唔好用方面民間自發一般都有優勢。

    😂不過存檔呢樣嘢應該大學相關學科嘅人都做緊?不過唔好嘅都係佢哋會受制於政府態度。


  • Citi

    @親衛隊 不如從粵語流行文化開始?比如粵語歌、電視劇、電影等,網上已經有好多相關資料,係咪可以整個portal之類嘅網站?


  • Citi

    其實粵語 垂直領域 相關嘅App依然比較少(甚至冇),影視平台喇(類似youtube),短片類喇(類似抖音),專門嘅書音影點評(類似豆瓣),專門嘅高質遊戲及文化分享(類似機核),等等

    呢啲都係商機同埋推動粵文化嘅方向🤔



  • @FaaLengKen我有N個關於粵文化嘅夢 裡說:

    其實粵語 垂直領域 相關嘅App依然比較少(甚至冇),影視平台喇(類似youtube),短片類喇(類似抖音),專門嘅書音影點評(類似豆瓣),專門嘅高質遊戲及文化分享(類似機核),等等

    呢啲都係商機同埋推動粵文化嘅方向🤔

    噉講我覺得粵語做老嘢生意會好過後生:lomore-sosad:


  • Citi

    @姬嘉鐸我老婆 單計市場來講老嘢肯定老嘢更懷舊;不過老嘢慳慣,唔捨得畀錢


  • Citi

    樓豬冇上水幾日?真係去咗實現夢想?:lomore-eating:


登入後回覆
 

相關主題

  • 14
  • 1
  • 9
  • 1
  • 10
  • 7
  • 15
  • 5
  • 12
  • 1
  • 33
  • 13
  • 5
  • 4
  • 1
  • 1
  • 10
  • 6
  • 9
  • 8