• Citi

    :【廣韻】【集韻】【韻會】【正韻】 達合切。【說文】從水,從曰(說)。 語多沓沓,若水之流——白話來講,即係口若懸河、滔滔不絕、口水多過茶。 引申爲衆多、重複,比如以下呢幾個詞:沓水、沓友、沓馬、人馬沓沓。

    除衆多、重複之義,「沓」字仲有另外一層解釋:合也。【揚雄·羽獵賦】出入日月,天與地沓。【註】言若天地相連合也。 所以,「沓」字可以做量詞來形容一堆擺放整齊、形狀規則嘅物品,從一沓錢一沓書到一沓瓦,甚至一沓樓。自然而然,將一堆物品整理成一「沓」呢個動作就可以稱爲「沓」,比如「啲書俾你搞亂嗮,快啲沓返好!」。

    講到呢處,就必須要講下何謂「落沓」。顧名思義,「落沓」即係落入「沓」中,成爲「沓」嘅一部分。驟眼睇落,呢個詞同「埋堆」好似,不過仔細恁下就體察到個中巧妙(kiu2 miu2):「堆」係物品無定形之集合,而「沓」就要齊齊整整,規規矩矩——由此就唔難領會「落沓」何解:一旦「落沓」,上下夾到實,㤢都唔㤢得,真係叫天不應叫地不靈,唯有跟足規矩,受人擺佈,乖乖聽話。所以「落沓」即係「入局」、「中伏」。不妨再以實例睇下呢個詞可以點用:

    由上可見,「落沓」一般要引誘,要呃呃啗啗(tam3,哄騙,俗寫「氹」),要畀啲甜頭人試下先;不過正所謂「牛唔飲水唔撳得牛頭低」,衹要謹記「光棍佬」教誨,莫貪便宜,邊有咁易「落沓」!

    講到鷚尾,都要提下「沓」「疊」有乜差別。受官話影響,而家好多人都用「疊」代替「沓」(特別係書面寫作),據説就連陶傑同倪匡都概莫能外,將「落沓」寫成「落疊」。查實呢兩個字意思上雖有相通(都表示繁多重複),讀音同用法卻大不相同:「沓」讀daap6,「疊」讀dip6;「疊」更多用來形容「重疊」,同埋表示「收拾」(如「折疊」「疊埋心水」)。雖然「疊」向官話入邊可作量詞,但自筆者記事起,講「一疊書」嘅人可謂絕無僅有。之不過而家粵語式微,話唔埋過多十零年講「一沓書」會被當成異類,就連「落沓」都要「正讀」成「落疊」!如果真係有呢一日,嗰陣粵語嘅收場點止「落碟」蒸煮咁簡單,直頭係「落鑊」炮製,煎皮拆骨!

  • Citi @恆智德

    @恆智德何謂「沓」 入面講:

    受官話影響,而家好多人都用「疊」代替「沓」(特別係書面寫作),據説就連陶傑同倪匡都概莫能外,將「落沓」寫成「落疊」。

    唔查唔知,通街都認「疊」作「沓」,多到嚇死人 :hkgxm-dead:

    好在正規字典無跟,「疊」就得dip6一個音
    https://jyut.net/query?q=疊

  • @恆智德

    @恆智德何謂「沓」 入面講:

    受官話影響,而家好多人都用「疊」代替「沓」(特別係書面寫作)

    1974年香港電臺製作嘅《獅子山下》系列其中一集《貴利》,明明講「利沓利」,字幕就變成「利疊利」(1:30)
    https://youtu.be/xXaGTHBE-Bo&t=90

相關主題

  • 19
  • 33
  • 12
  • 25
  • 23
  • 31
  • 12
  • 28
  • 8
  • 1