食擔豬膏未落膈,見身喐唔見米白

  • Citi

    http://www.cantonese.asia/portal.php?mod=view&aid=772
    2015-4-15 00:49| 發佈者: highyun| 原作者: 五世其

    摘要: 廣府人講說話,好多時同農業耕作有挐掕,當傳統生活景象逐漸式微時,坊間好多生鬼、抵死、到肉嘅講法就冇咗根𣚦,故之然現代化咗嘅廣府話今時唔同往日,聽落就倔擂槌唔夠「親民」。 ...

    近幾十年,衆人皆奉「發展是硬道理」為金科玉律,莫講話個個城市一個模咁倒出嚟,淨係一大拃石屎森林,好惡搵返舊陣時嘅風貌,就連好多城鎮農村啊,都同以往嘅生活狀態好唔一樣,乜都話加速現代化。而廣府人講說話,好多時同農業耕作有挐掕,當傳統生活景象逐漸式微時,坊間好多生鬼、抵死、到肉嘅講法就冇咗根𣚦,故之然現代化咗嘅廣府話今時唔同往日,聽落就倔擂槌唔夠「親民」。

    就以「見身喐唔見米白」為例,若果冇返啲生活體驗,就算你曉噏,都像唔出呢句說話係點嚟嘅。正所謂「知其然而不知其所以然」,唔少人都知係愛嚟形容有啲人周身冇時停、彳亍咁轉,一味喺處好落力咁做嘢,但係收效甚微、冇乜得着,譬如講啲咕喱辛水辛汗先賺得嗰一個幾毫,學生哥死咪書但係成績點都出唔到嚟,都可以話係「見身喐唔見米白」,至於「米白」,係同舊時尋常人家「舂米」個動作有關。舂米就係由上而下使力,分開穀嘅殼同米,喺機械化未普及嘅年代,通常啲人家屋企或者作坊仔、磨米間,就係𢬿舂坎嚟搞掂㗎喇。

    004651xcpcccbn4l909oob.jpg

    舂坎係用石整嘅,中間掏空,圓身尖㞘,座响地底,長木枋造嗰條就叫𣝉[deoi3],先係將啲谷放晒喺內坎,跟住利用杠桿原理,一個或兩個人喺𣝉[deoi3]尾用腳踹住,一䟴一𧿁[ngat6],𣝉[deoi3]頭掕住嚿鐵就一下高一下低咁舂嘞,啲谷舂到咁上下嘅時候,啲米肉嘅白色咪出咗嚟囉。之但係呢種咁嘅簡易架撐效率好低,一般舂好耐都舂唔得勻晒啲穀,舂完咗仲要篩走啲糠,有啲未舂得透嘅叫做大穀,仲要攞窩𨹄(簸箕)轉吓等佢埋心,執返出嚟,然之後先簸到啲米剩返落嚟,咁先叫做有米食,若果手勢唔好執唔出啲大穀,就畀人話你唔曉做米。成個過程都幾𨉣[haa1]人做同耽工㗎,收屘整整吓都冇乜人舂米嘞。「見身喐唔見米白」成句就係話𧿁[ngat6]咗半日都未見啲穀甩殼,個心唔煩就有鬼嘞。所以有時要了解某啲俗語嘅來源,真係要問吓啲老人家至得。

    講開又講,若果有人問起zung1瘟雞同瞌眼瞓zung1吓zung1吓個「zung1」點寫,睇完以上內容相信都應該曉教人,就係舂坎個「舂」,都係形容動作𩕟[ngap6]吓𩕟[ngap6]吓,下次咪個寫錯喇。仲有,去開赤柱有時間不妨行埋舂坎角,嗰處風景幾好。

    004753xcos6w2ji8ewsewc.jpg


  • 「膈」字點讀?[gaak3]?https://jyut.net/query?q=膈
    「落膈」 = 落格? :silly

相關主題